從娘家吃過飯後… 回家途中… 忽然口痕… 想來一杯痛快…
店員: 現在有優惠, 一次三杯有超級特價…
我: 一杯夠了…
店員: 三杯只需杯半價錢… 機會難得呀!
我: 那給我來三杯吧…
—
回到家後, 才記起裝修時把舊雪櫃棄掉了!
結果, 一個人… 一口氣吃了三杯雀巢朱古力杯裝雪糕… orz 
BLOG
新一代
臨出街前收看到一段有線新聞
說一些家長為兒女登記入學, 好多小朋友都能夠入讀第一志願既名校!
記者分別訪問家長及能夠入讀的小朋友, 家長都係一般應對, 好開心能入讀第一志願云云…
但有一小朋友的應對, 令我大為不安, 連襪都未著, 就忍唔住打呢篇blog抒發一下…
記者問小朋友入讀到第一志願有咩感覺, 小女孩應對如下:
"梗係開心啦, 可以入到間好學校, 咁就唔駛讀埋d垃圾學校"
—
小朋友識講呢種刻薄說話, 我相信100%係家長既問題, 當然… 可能呢位小朋友既家長自己都唔覺得係一個問題, 覺得社會地位凌駕別人, 絕對可以鄙視… 甚至可以任意對旁人大支野…
我未有機會教育自己下一代, 但身邊有不少朋友已為人父母, 我希望大家注意子女教育… 眼見新一代已經沒有了小朋友的天真, 漸漸變成一個個乳臭未乾, 但滿口是非的老人精…
義賣相片活動
一方有難, 八方扶持…
這個週末, 花了不少時間來準備突如其來的義賣的工作; 很累很累, 還有很多重要私事未做呢…
但是, 終於完成這義賣行動的籌備工作, 也算鬆了一口大氣…!
希望可以再為四川災民增添支持吧…
>>> 義賣關淑怡為賑災親筆簽名12R相片及主題相簿 <<<
還有9日時間, 善款go go go! 
遇見神
有冇諗過, 神係點既樣?
神… 我冇見過 (或者… 我根本唔知佢係神…)
但神既使者我就見唔少! 間中都會係街上遇見… 比較傳統既有和尚, 師姑及喇嘛, 佢地仲保持住宗教傳統, 剃頭及穿著道袍…
但係時代進步, 我不下數十次係逛電腦商場時碰到神既使者選購最新型號既notebook, pc, pda甚至iphone!
論產品update程度, 配合佢地一身既打扮, 可以用"喪潮"黎形容!
有次見某師姑在銅鑼灣地鐵出閘, 剛好係我前面… 隨手拿出一個hello kitty既八達通套do咭! 嘩! 我再一次對神既使者另眼相看… 原來佢地都會有凡人既喜好~
—
假如, 有日你遇見神, 同佢認識後; 發現佢原來做緊同你一樣平凡既事, 或同你一樣滿口潮語… 你會有咩感覺呢?
當神, 唔再係你諗咁神…
你會唔會覺得, 從來冇遇見神更好呢?
有野留返拜山講
香港人真係好鍾意講電話…
話說昨晚放工, 搭巴士返屋企, 身處上層頭排中間位置… 未坐低, 已經聽到座位旁既裝修判頭密密同電話中既伙計傾香港仔中心那住宅工程! 聲浪之大, 如果有其他位置選擇, 我一定會選擇遠離充滿嘈音及"體香"既呢個位置!
未幾, 後方坐位既另一位中港客貨運商電話響起, 聽到佢正同另一位生意上朋友密密傾一單生意; 酬金五千, 給租車及司機的費用三千, 餘下二千, 即每人可賺一千… 但那男人剛好手緊, 三千元的租車及司機費需要朋友先奠支, 又話今次真係需要朋友幫呢個忙, 有機會再報答云云…
左右耳正在接收兩單生意詳情之際, 另一邊的婦人開始佢同菲律賓工人之高聲對話(港式英語), 說妹妹家裡的賓賓要回老家, 急忙需要一個替工兩三個月時間, 高聲的OK, Umm, Arrr, Well, Yes, No… 斷續低聲的其他英文單字… 令我覺得佢為港式英語起革命, 令一句句刺耳既的句子, 驟然聽起來頗有韻律…
短短的十五分鐘巴士車程, 電話聲浪不絕於耳, 往玻璃窗的倒影後望, 發現原來香港人並不甘於浪費坐車的時間, 總要找些工作來充填時間, 傾電話係一個非常慣常既方法…
我呢個只想靜靜地坐車, 乜都唔做既人; 被強迫分享佢地生命中既繁忙節奏, 承受佢地家庭既煩惱…
*** 後記: 講電話你有你自由, 公眾地方, 真係請注意聲浪, 太多人講電話不自覺地將自己聲線較到最大呀!!! 
***
***發錢寒
近日打算為家中添置一部LCD電視, 之前已經留意到有個HSBC信用咭迎新優惠:
出兩張HSBC信用咭, 各咭簽賬$2800大元, 再另加$9999就可以換到Samsung 40寸全高清內置解碼LCD電視一部 ! 以呢個config兼名牌電視黎講, 真係無敵~ 可惜離我家裝修完工日尚有一段距離, 又唔想作出無謂簽賬, 所以思想了個多月仍未行動…
發覺網上近日已經流傳大量"二手全新貨", 價錢由$11500至$13500不等… 原來香港有一大班努力不懈既人, 為左賺取$1500至$3500呢個利潤, 一早已經開晒新咭, 並簽好賬… 手執兩大封換領信出售, 甚至換埋大大部電視原盒放左係屋企! 在各大二手website登廣告, 靜待有人幫襯… 
大概估計有好多我呢類怕麻煩但又想換呢部電視吸引既人上釣罷?
勤力的香港小蜜蜂不斷工作, 不斷找方法"搵快錢", 為著自己目標的富足生活奔波…
—
而我這條小懶蟲呢? 掛在脖子上的餅乾吃光之後… 好像會懶洋洋, 眼光光地餓死~ 阿門! 
