令香港網友慘輸的蘋果iphone 4s註冊機械人接受”委托”了!
http://item.taobao.com/item.htm?id=13340294072
租用一次要人仔300, 計落都只係港幣$370左右… 炒價黎講相當抵玩! 不過就算機械人成功註冊, 都要你親自去IFC取機…
唔知租一次可以訂購一部定兩部4s呢? 店主現不在線, 趁店主上線再查詢一下!
BLOG
高清電視入牆插座
近月飽受高清電視爆格之苦; 標清翡翠台, 明珠台等普通台瘋狂爆格, 近乎睇唔到, 高清系列就比較好, 只係間中爆下…
試過換條靚天線, 無用… 又重新整理好電視櫃後雜亂無章既電線, 以免電線互相干擾, 又無用… 最後以為係舊樓公共天線老化無得救… 算了!
但細心諗下, 爆格情況以前係無既… 而且病況越黎越嚴重… 近日終於”的”起心肝, 去google搜尋一下同類案件, 發覺原來唔少人都有一樣情況…
網友們既方法好多我都試過… 最簡單換條靚天線, 再惡劣就加放大器, 或者索性成條入牆線拉過條靚線… 以上方法我都試過, 但效果並唔顯注! 最後, 我發現一位網友建議放棄成個入牆插座, 改為入牆線直駁機頂盒…
雖然呢個方法幾麻煩下… 最後都把心一橫, 照樣拆去插座位, 將牆內天線直接駁長入機頂盒!
本來心裡面仍然好懷疑呢個方法到底係唔係行得通, 但接駁後開電視, 竟然真係全部台都睇得返晒! 接收仲非常清晰添!
睇返個入牆插座, 裡面有個少少既電路版, 唔知係唔係太舊, 或者只係為舊式電視而設, 反而影響高清接收呢? 而家拆走左… 清晒!!!
MASPRO PK-842
到底有冇人知呢舊野用黎做乜既呢? 佢又點會影響到高清電視接收呢?
人與電腦大戰
趁食lunch有些少時間, 分享一下近日所見趣事…
上篇blog寫到香港apple store推出了iphone 4s既預訂服務, 讓顧客可以預早一日經網上訂購, 翌日就可以在預定時間親身到IFC取機, 免除冒風雨排隊兼捱夜之苦…
呢個措施原意係幫助果友們輕鬆啲購買蘋果產品, 但因僧多粥少, 炒機價仍然高企兼每日預訂額有限, 預訂既配額依然供不應求… 雖然八國聯軍唔再須要在IFC排大隊輪候… 但戰場已經轉移左去蘋果預訂網頁, 繼續日夜開戰…
由於沒有確實預訂時間, 強國同胞及本地網友都分秒捕住個訂購網頁… 希望捕捉到開賣一剎, 購入4s自用或賣出圖利(佔多數)!
可惜, 香港同胞萬萬估唔到內地同胞會出動”註冊”機械人打茅波… 咩叫”註冊”機械人? 簡單黎講, 就係一套電腦程式, 可以以超短時間完成整套訂購程序… 聽聞由於機械人不需要通過正常註冊版面(太technical, 不會在此解釋), 就可短至幾微秒完成登記… 由於每個transaction時間快, 所以可以在短時間內反複登記, 直至所有配額派完!
兼且程式可以時刻監視apple store網頁, 一旦開始登記, 就即時啟動登記模式, 實在比香港網友日夜金睛火眼及住為有效!
雖然話註冊機械人如此強勁, 間中總會有漏網之魚… 被香港網友成功截擊, 訂購到少量4s! 所以連續個幾星期都有唔少師兄鍥而不捨, 希望在機械人手指隙度撈到一兩部4s炒下!
上HKEPC forum個討論區, 見到唔少師兄們都時刻報告戰情, 例如… 12:25開左1秒16G W, 32G B, 同時亦會有大量師兄和應, 相當有趣! 但眼見, 大量報告提及網頁一般只開幾秒就被機械人攻陷(即全部預訂配額用完), 甚少見到有網友成功預訂!
當然, 間中亦有傳來勝利之音, 向世界炫耀一番!
小弟實在佩服香港的網友, 遇著強大既強國敵人, 仍然能不屈不撓咁日夜對抗…
呢啲, 咪係香港精神…! 加油! 日夜戰鬥的網友們!
炒不完, 遍地黃牛
一段時間無心寫blog, 睇返… 原來都已經成兩個月…
近排熱話, 就一定離不開喪炒新出既iphone 4s, 拜iphone所賜, 小弟呢個blog既點擊率都升左唔少; 原因好簡單, 因為年頭出過一篇違失iphone既文章, 內裡提及iphone, smartone, 出機, 續約之類既關鍵字… 因近期熱門搜尋就係呢類keyword, 所以唔少人盲鐘鐘就入左黎…
講返正題, iphone 4s可以繼續大炒, 實在係小弟萬料不及, 因為真心覺得佢同iphone 4分別唔大… 唔同就係個cpu勁左, 但正常用家又唔會有太大得著; 另外就係個siri… 講真, 我就接受唔到同部電話傾計, 玩下就無妨… 不過, 我知有人真係成日搵siri傾計解悶… xd
說穿了, 熱賣最大原因都係因為大陸有無數同胞未擁有iphone 4/4s, 需求大, 供應少, 就自然有利可圖… 所以眼見各弟兄姊妹湧去排隊出機, 第一件事都係問”水位”多過問部機到底有乜功能增強左?
巧合既係, 小弟近排都係打算買部4s送禮, 但從正常途徑根本無可能買到… 去forum睇下, 其實發覺4s一街都係… 只不過係全部已落入大大小小炒家手上, 16G markup $1200 – $1800不等… 32G/64G就無咁熾熱, 好多都只mark up$1000左右… 原因… 當然係需求少, 一部電話… 要咁大G數把鬼咩… 正常人16G已經夠有凸… 小弟部iphone 4 16G, 就長期保持在10G滿左右…
如果唔甘心被炒家食價, 想出機, 大多數人就只有向各大電訊商下跪, 受縛兩年長約… 但如果部iphone係用黎送禮又點呢? 邊有咁多個號碼得黎受縛呀?
同朋友傾開, 原來仲有好多人覺得”零機價”係抵喎! 出埋個plan都唔會蝕好多… 我唔明點解佢地仲會仍然信奉”零機價”係抵呢個傳說… 事實上, 各電訊商大大小小既”零機價”, 除番開每個月實際俾出黎既台費仍然要介乎$220 – $270之間, “零機價”唯一好處, 就只係全成缺貨時可以用”原價”買到iphone既唯一選擇…
當然, 如果你本身就唔需要呢個plan, 你用”零機價”去出機… 就等如你兩年俾多成$6000去出部iphone… 多左個電話號碼又係廢既… 不如忍痛俾千五蚊益炒家好過, 一了百了, 無後顧之憂!
另外, 同上次開賣iphone 4不同之處, 就係每朝排大電器連鎖店既人龍消失了… 唔係因為豐澤同百老匯無機賣, 據稱係兩大電器店目標獵物係專政內地自由行… 無他既, 內地人有既係錢, 無既係時間… 落到黎急急腳買iphone 4s快閃, 要硬食$3000-$5000電子垃圾無托手掙…
有大陸網友話… 去百老滙出iphone 4s, 要搭兩隻千幾蚊既藍芽handsfree, 或者幾千蚊家電貨尾先肯賣… 諗住買兩隻handsfree算叫有啲用, 就搭左二千幾兩隻藍芽出左部64G… 買完後先發覺隻handsfree正價都只不過係三百蚊, 大呻搵笨… 早知貴千零蚊益炒家好過!
部4s出左半個月多啲, 但市況仍然係超癲! 一部香港人人都渣係手既手機… 竟然周圍都無貨兼炒貴兩成以上…
小弟近期經常蒲HKEPC, DCFEVER呢類討論區, 關注下”市況”之餘, 同時都睇下各大炒家, 偽用家及真正用家買iphone既心路歷程… 睇佢地呻下買唔到機既苦況, 或者欣賞下佢地狂食酸葡萄既po文…
細看之下, 其實iphone市場同香港樓市景像一樣… 好少貨, 但好多人買, 好多另類選擇, 但無人買… 買4s既佔大部份都唔係真正用家, 真係急需既, 就只有硬食炒價, 或被電訊商縛住張長約, 付出昂貴既月費… 另一部份用家, 不甘受”屈”, 死堅持用原價買機的… 就不斷埋怨蘋果出貨太少, 對真正用家唔公平, 又指啲貨被炒家, 大陸人搶晒… 總之就想蘋果帶頭做點事, 令到自己可以無痛苦無付出地買到iphone…
講真, 高呼”唔公平”既人… 好多咪又係嗰批買唔到機黎炒既偽用家而已, 試諗下… 俾佢地”上到車”, 得手後咪又係高價放出黎賺錢? 蘋果采你地都傻… 只要部機有人買就得, 理得你咩叫公平唔公平, 用家唔用家, 總之啲貨長賣長斷市就得啦!
Apple store今次推出一個預訂系統, 報稱可以今日訂機, 明日就可親身到IFC取機… 小弟都試過, 但從未成功見到訂機畫面… 因為訂機時間不固定, 你唔知幾時開始接受訂機, 同時… 消息指每次開始接受預訂時間不到5秒就會玩完… 大量網友投訴訂唔到機… 後來, 報章報導原來係內地有”程式買盤”不斷監視同操控預訂網頁, 所以… 人類大戰電腦, 慘輸… 大部份可預訂既4s都落入內地人手上…
香港人繼續輸, 輸了給有錢, 有人力, 有高科技的強國人…
Lunch時間又過, 吹住咁多先!
深水埗街頭驅鼠器騙子
日前, 放工係深水埗”深之都”對面… 見到有檔小販賣小型驅鼠器, 本來賣小電器既小販並冇乜好提, 但呢位小販, 除左賣野之外… 仲會有個表演, 就係開驅鼠器嚇佢檔口隻白老鼠仔…
每當有人買, 或者佢講解到某情節, 佢就會開左驅鼠器個電源, 咁… 困係籠仔裡面隻白老鼠就會嚇到成隻彈起, 係籠裡面周圍走…
雖然我都唔鍾意老鼠, 但… 睇完佢嚇鬼左隻白老鼠幾下, 個心都已經好唔舒服… 急急走人… 之後再係facebook抒發下…
都唔少熱血既朋友睇完我既post都覺得呢位小販哥仔唔岩… 梗係啦… 幾唔鍾意老鼠, 都唔可以拎佢地黎當眾折磨… 始終都係一條生命黎嘛…
事隔一個禮拜… 睇睇下forum, 發覺原來都有啲人討論呢件事…
爬下文, 發現… 原來呢位小販大哥… 只係一個”賣燈”既騙子!!!
睇完段youtube, 真係激到奀…
再睇下淘寶, 原來盞燈仔, 淘寶都只係賣幾蚊人仔… 而家位大哥賣五十蚊, 就算分埋俾兩位做足全日”妹”既師奶… 都真係賺到喊…
最難為都係果隻一日被”電”幾百次既白老鼠(網民相信佢被搖控既千人震電)… 同埋果班真係屋企有老鼠而又受騙既勞苦大眾…
唉, 香港… 越黎越似大陸, 街頭再出現low tech騙子…
再談Buffalo Linkstation NAS
話說部Buffalo NAS經過兩個月來辛勞, 將所有重要file都backup好晒, 近月都變得悠悠閒閒…
成二千幾銀買返黎, 當然唔想佢閒置, 把心一橫, 將兩個RAID 1 HDD拆返出黎, 諗住套隻裝滿左高清電影既HD入去, 當唔需要backup既時候, 將隻NAS變成media centre…
諗當然係理想, 但套完隻HDD入去, 咦? 點解隻NAS認唔到個HDD既? 仲著左紅燈, 上網查下啲黃綠forum, 有人話呢個係EM Mode (Engineer Mode), 當插左隻新HDD入去, 就會提示你裝firmware入去個HDD度, 咁先會用得…
心諗, 都好合理丫… 裝個firmware落去姐, 應該唔會有乜事… 就算有事, 都係戲黎姐… 懶人就係咁, 一萬個藉口話自己聽安全… 諗都唔夠半分鐘, 就去按個”function”掣, 見到紅燈閃下閃下… 即係load緊個firmware入HDD度囉…
十分鐘後, 奇怪事開始發生… 見到紅燈好有規則咁閃, 兩長兩短咁… 又查一下網絡天書(即係google), 今次話… 呢種閃法叫E22, harddisk mount error喎… 嘩! 趴街了… 即刻熄左個NAS, 再拔返出去去個USB Docking度俾windows 7 read下, 唉… 原來真係炒花左我隻HDD…
真係不知所謂, 原來安裝firmware, 佢係會format左你隻HDD先既… 嘩! 真係低能… 雖然只係幾百G戲, 但都花左唔少時間珍藏返黎, 幾分鐘就隊霖左, 難免有少少失落…
但最大問題係, 拆左出黎果兩隻HDD又點呢? 會唔會塞返入去之後死晒架?
呢次真係諗左好耐… 好耐… 好耐… 好耐…
突然醒起, 之前大約人肉從NAS反向backup左啲最重要既野落另一隻HDD度, 拿拿臨搵返隻HDD出黎, 睇得清清楚楚, 裡面真係有第三個backup… 見到真係有, 個心先比較安樂…
計算一下, 如果插返兩隻HDD入去後真係炒霖左, 會損失幾多野…
計算過都值得搏之後, 手震震咁吉返兩隻HDD入去, 再手震震咁開power…
藍燈瘋狂亂閃左四五分鐘… 終於肯停低落黎…
即刻走入file explorer開個network folder睇一睇… 噓! 鬆口大氣, 啲野係返晒度… 安全安全…
以後, 萬事都係小心為上… 今次損失左幾百G戲… 都算做皮外傷… 如果損失左十幾年來既file backup, 咁就真係一刀插入我心, 加點眼淚陪襯…
灌水
灌水呢個名詞聽左好耐 (指在forum亂post亂re文搏升level), 但唔明點解啲人咁無聊…
今日終於明解!
話說在某大forum見到篇文好想re, 但re果下先發現… SHIT! 會員level唔夠高, 所以在某版只得個睇字… 要升到高一個level先可以回文!
原來, 初級level會員, 要在指定版區回覆或發帖超過100個以上先可以升呢!
唔怪得成個forum都係”thanks for your sharing”同啲九唔搭八既回文同po文…
今日, 我都花左一粒鐘在office灌水… 先灌得果20零個, 真係浪費光陰之極!
—
後記:
灌水灌左幾粒鐘, 眼都花埋, 先得果70零個post, 仲有30個要捱先升到呢, 點知, 突然間收到site admin私人送既20幾點分數, 加埋剛到升到呢!
原來, 佢一路都mon住我, 留意到我灌水, 我既努力感動左佢… 原來, 個forum真係有人mon住啲人亂灌水的… 好彩, 佢都話我灌得幾認真, 所以就升我呢… 佢話, 如果我亂咁回文黎為升呢, 佢會等到我升左呢先cut我account喎!
嘩… 我第一次感到真心付出後既收獲係幾咁珍貴… 多謝… 多謝…
將冰山劈開
公司冇咁忙, 早左返屋企… 可以過返下爆HEA生活, TVB啲爛劇幫唔到我… 反而沉上左youtube煲舊MTV…
一連兩晚狂煲夢劇院, 太極, 達明一派, Raidas… 煲完樂隊就再煲小學至初中時代既張國榮梅艷芳…
直至random到呢首歌… “將冰山劈開”… 首歌當然係經典, 有草蜢伴舞加原曲仲有許志安添…
但睇下睇下… 竟然諗起左中一時候既片段…
就係… 成班十幾個同學, 放學後一齊去”黃金戲院”睇4點場… 我人生之中第一套入戲院睇既咸戲… 係日本片黎, 配左廣東話, 片名就係叫”將冰山劈開”囉…
成班友仔啲錢貢獻晒俾機舖, 冇乜多餘錢… 只係買左8張飛… 搣飛嗰陣博大霧, 個職員都未數齊成班友仔12人就衝晒入去…
最後攪到啲帶位入晒黎數人頭, 我地又醒呀… 坐散晒, 最後有兩個同學被”周”… 只有補返飛囉… 都總算偷雞買少左2張…
內容仲依稀記得少少, 當然… 冇打算同大家分享…
但最難忘既, 反而唔係劇情, 係某一位蕭姓同學, 一到重要既”情節”就破口嘰嘰聲咁笑, 攪到成場人都擰轉頭啤實佢, 真係羞家… 似乎, 佢真係完全冇閱讀及睇帶經驗, 顯得比較興奮(在臉上)…
而我屬於較內斂既同學, 關鍵既moment, 會記得保持冷靜(臉上), 以免防礙他人觀看影片…
唔講大家可能唔知… 當年高登旁邊, 及高登新翼分別係兩間戲院(前者叫黃金戲院, 後者唔記得左)… 4點場有平價戲睇… 而我放學放三點半, 成日都可以睇平戲… 不過… 當年沉迷機舖既時間比返學仲要多… 事實都冇錢同時間去睇戲…
儲值咭神農氏
用左儲值咭都好多年, 咪以為買儲值咭只需要考慮價錢, 其實款式繁多, 花多眼亂… 要揀一張真正合適, 真係唔易…
以前就話內地旅行先用得上儲值咭, 而家去澳門、台灣甚至泰國都可以用大陸儲值咭… 仲有, 去拍賣網或淘寶唔想俾人知你個人電話, 儲值咭都可以代勞…
目前, 用過既儲值咭真係記唔起咁多款… 不過原來買來買去大部份都係”如意通”, “神州行”, 另外近期就有”中移動”, “中港通”…
自己唔係中港常客, 近年張咭都主要係用黎去拍賣網賣野買野… 有時儲值咭到期要換咭, 去到鴨記幾千款選擇… 真係唔知揀邊張好… 有時抱住幾十蚊乜都試下既心態, 多數都係試下新款… 好彩就當然對新咭滿意, 有時都會失望的… 因為買左先發覺各有限制…
回顧一下, 其實儲值咭最緊要都係睇幾樣野:
1. 固定號碼
有啲咭, 只有香港固定號碼, 大陸號碼要另俾月費先會隨機派俾你, 呢類咭真係必入黑名單, 如果你唔連續養住個大陸號碼, 每次申請大陸號碼再派個新號碼俾你, 記number都記到暈!
最好係鴨記某啲款可以揀岩號碼先出, 雖然靚既number都俾檔主扣起晒, 但總會有啲比較好記既號碼揀得落手…
以前啲一咭兩號既儲值咭, 大陸號碼同香港號碼尾數係一樣的, 好方便… 最正嗰次, 中/港號碼尾7個字完全相同, 真係易記到爆(到而家我仲記得!)… 可惜, 嗰張係冇sms服務… 最後, 到期都要好唔捨得咁放棄佢唔再續…
(呢張中國移動一咭多號, 要$20月費先會派個大陸號碼俾你)
2. 有效期限
好多咭有效期限得三個月, 真係眨下眼又夠期續, 揀啲至少六個月嗰啲, 唔駛成日攪充值或換咭…
(呢張如意中港通得三個月期限, 諗住keep number就咪制)
3. 月費
要留意下張咭有冇需要俾月費, 試過一張中國移動一咭多號既咭, 每個月扣$20蚊月費, 另外仲要分分鐘計錢, 未夠六個月限期已經扣晒錢… 以我呢類低用量, 只係想keep個number既人, 真係唔應該用月費咭… 除非扣埋月費都仲多過六個月, 咁又唔同…
4. SMS
要留意sms係咪可以send大陸或香港電話, 買過一款大陸如意通竟然係唔可以send sms, 只可以收, 真係即場暈低!
5. 飛線
有啲儲值咭包埋飛線功能, 呢個功能有時都幾好用; 因為有時只係需要接電話, 咁就唔需要成日換咭, 或者要帶兩部電話出街咁煩…
(呢張如意香港通有180日限期, 美中不足就係冇飛線) *** $50元有90日, $100元有180日 ***
(呢張中港通有飛線服務, 但係就只得90日有效期)
6. 鬼咭
如果只係需要張咭黎打一兩個電話, 或收sms一段短時間; 不妨試下用鴨記不知名既”鬼咭”, 冇包裝, 白咭一張, 有3HK logo, 賣$8(前一陣子只係賣$5咋!)
唔知有效期幾耐, 聽店主講有百幾分鐘!
(呢張平咭, 仲係3G咭黎添!)
